Tramp bəraət aldı
ABŞ Konqresinin üst qanadı – Senat Donald Trampı prezident postunda saxlamaq qərarı çıxarıb. Novator.az-ın məlumatına görə, səsvermə fevralın 5-də keçirilib.
2019-cu il dekabrın 18-də Konqresin alt qanadı – Nümayəndələr Palatası Donald Trampın vəzifədən uzaqlaşdırılmasına səs vermişdi. Dövlət başçısı vəzifə səlahiyyətlərini aşmaqda və Konqresin işinə əngəl törətməkdə təqsirli bilinmiş, məsələ Senata ötürülmüşdü.
İmpiçmentin təşəbbüskarı olan müxalif konqresmenlər bildirir ki, Donald Tramp ABŞ-ın Ukraynaya hərbi yardımını ləngitməklə bu ölkənin prezidenti Vladimir Zelenskiyə təzyiq edib. İddiaya görə, Donald Tramp Vladimir Zelenskini ABŞ-ın sabiq vitse-prezidenti Cozef Baydenin oğlu Hanter Baydenin işi üzrə araşdırmanı davam etdirməyə çağırıb. Hanter Bayden 2014-2019-cu illərdə Ukraynanın “Burisma” qaz şirkətinin rəhbərlərindən olub. Ukrayna Baş Prokurorluğu “Burisma”nın hər ay Hanter Bayden və tərəfdaşlarına məxsus başqa bir şirkətin hesabına ayda 160 min dollardan çox pul köçürdüyünü aşkara çıxarıb, ancaq 2016-cı ildə bu araşdırma yarımçıq saxlanıb.
Vitse-prezident postunu 2009-2017-ci illərdə tutan demokrat Cozef Bayden bu ilin noyabrında keçiriləcək prezident seçkisində Donald Trampın potensial rəqibi sayılır.
Fevralın 5-i Senatda keçirilən səsvermə Donald Trampın xeyrinə bitib. Birinci ittihamı 100 nəfərlik Senatda 48, ikinci ittihamı 47 nəfər dəstəkləyib və prezident bəraət alaraq kürsüsünü qoruyub.
Donald Tramp 1946-cı ildə Nyu-York ştatında doğulub. Pensilvaniya Universitetinin Uorton Biznes Məktəbini bitirib, bütün karyerasını tikinti biznesinə həsr edib.
1999-cu ildən Respublikaçılar Partiyasının üzvüdür. O, 2016-cı il noyabrın 8-də keçirilmiş ümumxalq seçkisində Demokratlar Partiyasından Hillari Klintonu məğlub edib, 538 nəfərlik Seçicilər Kollegiyasına 306 nümayəndə qazanıb. Seçicilər Kollegiyası həmin il dekabrın 19-da prezident seçkisi ilə bağlı yekun qərarını verib. Səsvermədə 304 nəfər Donald Trampı dəstəkləyib. Seçicilər Kollegiyasındakı səsvermənin nəticəsi Konqresin 2017-ci il yanvarın 6-da keçirilən iclasında təsdiqlənib. Donald Tramp yanvarın 20-də səlahiyyətlərinin icrasına başlayıb.
ABŞ-da növbəti prezident seçkisi 2020-ci il noyabrın 3-nə təyin olunub.
Ölkə konstitusiyasına görə, eyni şəxs yalnız iki dəfə prezident seçilə bilər.
