Tofiq Qasımovun xatirəsinə həsr olunmuş tədbir keçirilib
Fevralın 3-də Müsavat Partiyasının mərkəzi qərargahında Azərbaycan milli azadlıq hərəkatının liderlərindən biri, sabiq xarici işlər naziri, Müsavat Partiyasının üzvü Tofiq Qasımovun xatirəsinə həsr olunmuş tədbir keçirilib.
Tədbirdə Tofiq Qasımovun əqidə yoldaşları və dostları – Müsavat başqanı Arif Hacılı, Milli Strateji Düşüncə Mərkəzinin sədri İsa Qəmbər, Xalq Demokratik Partiyasının sədri Rafiq Turabxanoğlu, siyasətçilər Arzu Səmədbəyli, Vaqif Hacıbəyli, Hikmət Hacızadə, Nüşabə Sadıxlı, Almaz Əliqızı, Gülağa Aslanlı, Mirbaba Babayev, Fəxrəddin Bağırov və digərləri iştirak ediblər.
Tədbirdə səslənən çıxışlarda Tofiq Qasımovun keçdiyi həyat yolundan, onun Azərbaycanın ictimai-siyasi tarixindəki rolundan danışılıb.
Tofiq Qasımov 1938-ci ildə Ağdaşın Ləki kəndində anadan olub. Azərbaycan Dövlət Universitetinin (Bakı) fizika-riyaziyyat fakültəsini və SSRİ Elmlər Akademiyasının Fizika-Texnika İnstitutunun (Leninqrad, indiki Sankt-Peterburq) aspiranturasını bitirib, uzun illər fizika-riyaziyyat elmləri namizədi dərəcəsi ilə elm sahəsində çalışıb.
Azərbaycan Xalq Cəbhəsinin qurucularından biridir. 1990-cı ildən parlamentin üzvü olub. 1992-1993-cü illərdə Azərbaycanın xarici işlər naziri postunu tutub. Uzun illər İsveçrədə yaşayıb və 2020-ci ilin yanvarında bu ölkədə vəfat edib.
