Polad Bülbüloğlu “Heydər Əliyev” ordeni aldı
Fevralın 3-də prezident İlham Əliyev bəstəkar və müğənni, xalq artisti, dövlət xadimi, diplomat Polad Bülbüloğlunu “Heydər Əliyev” ordeni ilə təltif edib. Təltif Polad Bülbüloğlunun Azərbaycan mədəniyyətinin inkişafında böyük xidmətləri və uzunmüddətli səmərəli ictimai-siyasi fəaliyyəti ilə əsaslandırılıb.
Fevralın 4-də Polad Bülbüloğlunun 75 yaşı tamam olur. O, 1988-2006-cı illərdə Azərbaycanın mədəniyyət naziri olub, 2006-cı ildən Azərbaycanın Rusiyadakı səfiridir.
“Heydər Əliyev” ordeni 2005-ci ildə təsis edilib. Azərbaycanın ali dövlət mükafatıdır.
Novator.az bildirir ki, Polad Bülbüloğluna qədər “Heydər Əliyev” ordeni ilə dövlət başçısı İlham Əliyev daxil olmaqla (Azərbaycan prezidentinə orden onun statusuna görə verilir) 25 nəfər təltif edilib.
Onların 14-ü əcnəbi siyasətçidir: Jak Şirak, Viktor Yuşşenko, Şeyx Sabah əl-Əhməd-əl-cabir əs-Sabah, Lex Kaçinski, Valdis Zatlers, Trayan Besesku, Georgi Pırvanov, İmaməli Rəhman, Abdulla Gül, Viktor Yanukoviç, Rəcəb Teyyub Ərdoğan, Aleksandr Lukaşenko, Nursultan Nazarbayev, Serco Mattarella.
“Heydər Əliyev” ordeni ilə təltif olunan digər 10 şəxs bunlardır: türkiyəli alim İhsan Doğramacı, musiqiçi Mstislav Rostropoviç, rəssam Tahir Salahov, bəstəkar Arif Məlikov, birinci vitse-prezident Mehriban Əliyeva, müğənni Zeynəb Xanlarova, heykəltəraş Ömər Eldarov, şeyxülislam Allahşükür Paşazadə, dövlət xadimi və alim Ramiz Mehdiyev, neftçi alim və geoloq Xoşbəxt Yusifzadə.
