Novxanıda aksiyalar
Yanvarın 31-də Müsavat Partiyasının və Demokratik Qüvvələrin Milli Şurasının üzvləri günün ayrı-ayrı saatlarında Bakının Novxanı qəsəbəsində yürüş-mitinqlər keçiriblər.
Bu aksiyalar Azərbaycan Xalq Cümhuriyyətinin qurucu lideri Məhəmməd Əmin Rəsulzadənin anadan olmasının 136-cı ildönümü münasibətilə təşkil olunub.
Məhəmməd Əmin Rəsulzadə 1884-cü il yanvarın 31-də Novxanıda anadan olub. Bakıdakı II rus-müsəlman məktəbində, Bakı Texniki Məktəbində təhsil alıb.
1903-cü ildə Azərbaycanlı Gənc İnqilabçılar Dərnəyini yaradıb. 1904-cü ildə Rusiya Sosial Demokrat Fəhlə Partiyasının nəzdində “Hümmət” Sosial Demokrat Təşkilatının yaradıcılarından olub. 1907-ci ildə RSDFP-dən uzaqlaşıb rus müstəmləkə üsul-idarəsinə qarşı fəaliyyətə başlayıb.
1911-ci ildə Müsavat Partiyasının qurulmasında iştirak edib. Partiyanın ilk başqanı olub. 1918-ci ildə Azərbaycanın müstəqilliyini bəyan edən Milli Şuraya sədrlik, daha sonra Azərbaycanın ilk parlamentində Müsavat fraksiyasına başçılıq edib.
1920-ci ildə bolşeviklər Azərbaycanı işğal edəndə həbs olunub, azadlığa çıxandan sonra Moskvada yaşayıb. 1922-ci ildə Finlandiyaya, oradan Fransaya, sonra Türkiyəyə gedib. 1955-ci il martın 6-sı Ankarada vəfat edib, “Əsri” qəbiristanlığında dəfn olunub.
Novator.az xəbər verir ki, Müsavat Partiyasının və Demokratik Qüvvələrin Milli Şurasının üzvləri yanvarın 31-də Novxanı qəsəbəsində keçirdikləri yürüşlər zamanı Cümhuriyyət liderinin şərəfinə şüarlar səsləndiriblər. Məhəmməd Əmin Rəsulzadənin qəsəbədəki heykəli önündə təşkil olunan mitinqlərdə isə Xalq Cümhuriyyətinin qurucularından, onların Azərbaycan tarixindəki rolundan, hazırda ölkədəki ictimai-siyasi vəziyyətdən danışılıb.
