Səfər Mehdiyev general-polkovnik oldu
Prezident İlham Əliyevin 30 yanvar sərəncamı ilə Dövlət Gömrük Komitəsinin sədri Səfər Mehdiyevə gömrük xidməti general-polkovniki ali xüsusi rütbəsi verilib.
Novator.az bildirir ki, Səfər Mehdiyev 1973-cü il martın 17-də doğulub. Türkiyənin Egey Universitetini, Azərbaycan Dövlət İqtisad Universitetini, Bakı Dövlət Universitetini bitirib.
1999-2004-cü illərdə Dövlət Gömrük Komitəsində inspektor, böyük inspektor, şöbə rəisi, baş idarə rəisinin müavini vəzifələrində çalışıb.
2004-cü ildən Dövlət Gömrük Komitəsi sədrinin müavini, 2006-cı ildən birinci müavini olub.
23 aprel 2018-ci ildən Dövlət Gömrük Komitəsinin sədridir.
Prezidentin 30 yanvar sərəncamı ilə Dövlət Gömrük Komitəsinin iki əməkdaşının gömrük xidməti general-leytenantı ali xüsusi rütbəsi almasını nəzərdə tutur: Dövlət Gömrük Komitəsi sədrinin birinci müavini İsmayıl Xəlil oğlu Hüseynov, Naxçıvan Muxtar Respublikası Dövlət Gömrük Komitəsinin sədri Səhət İsa oğlu Həbibbəyli.
General-mayor ali xüsusi rütbəsi alan şəxslər bunlardır: Aksizli Mallar üzrə Baş Gömrük İdarəsinin rəisi Həsən Nəbi oğlu Eyubov, Hava Nəqliyyatında Baş Gömrük İdarəsinin rəisi Bəhruz Faiq oğlu Quliyev.
Dövlət Gömrük Komitəsinin Tibbi Xidmət İdarəsinin rəisi Ceyhun Yusuf oğlu Məmmədova tibb xidməti general-mayoru ali xüsusi rütbəsi verilib.
Yanvarın 30-da Azərbaycanın gömrük orqanlarının yaradılmasının 28-ci ili tamam olub.
