Neftsiz ixracın göstəriciləri
İqtisadi İslahatların Təhlili və Kommunikasiya Mərkəzi ixrac icmalı yayıb. Rəsmi hesabata görə, 2019-cu ildə Azərbaycandan 1 milyard 954 milyon ABŞ dolları dəyərində qeyri-neft məhsulu ixrac olunub: “2018-ci illə müqayisədə qeyri-neft sektoru üzrə ixrac 265 milyon ABŞ dolları və ya 15,7 faiz artıb. Rusiyaya 690,6 milyon, Türkiyəyə 401,8 milyon, İsveçrəyə 179 milyon, Gürcüstana 159,1 milyon, Ukraynaya 50,6 milyon ABŞ dolları dəyərində mal göndərilib.
Qeyri-neft sektoruna aid malların siyahısında pomidor 189,3 milyon ABŞ dolları ilə liderlik edib, sikkə kəsilməsində istifadə olunmayan, digər emal olunmamış formalarda qızıl (172,4 milyon ABŞ dolları) ikinci, qabığı təmizlənmiş meşə fındığı (124,2 milyon ABŞ dolları) üçüncü olub”.
İcmalda meyvə-tərəvəz ixracı 605,8 milyon, plastmas və onlardan hazırlanan məmulatların ixracı 179,4 milyon, alüminium və ondan hazırlanan məmulatların ixracı 128 milyon, pambıq lifi ixracı 124 milyon, kimya sənayesi məhsullarının ixracı 102,9 milyon, elektrik enerjisinin ixracı 76,8 milyon, qara metallar və onlardan hazırlanan məmulatların ixracı 57,6 milyon, pambıq ipliyi ixracı 30,2 milyon, şəkər ixracı 26,9 milyon, alkoqollu və alkoqolsuz içkilərin ixracı 23,7 milyon ABŞ dolları dəyərində göstərilir.
