Partiyalılıq qadağası işləyirmi?
“Siyasi partiyalar haqqında” qanuna görə, dövlət mətbuatı orqanlarının işçiləri siyasi partiyaların üzvü ola bilməz. Söhbət hansı media quruluşlarından gedir? Məsələn, “Azərbaycan” qəzeti Milli Məclisin orqanıdır. “Xalq qəzeti”nin, “Respublika” və “Bakinski raboçi” qəzetlərinin təsisçilərindən biri Prezidentin İşlər İdarəsidir. Nazirliklərin və başqa dövlət qurumlarının təsis etdiyi nəşrlər də var. Qadağa bunların hamısınamı şamil olunmalıdır? Təcrübədə bu qadağaya nə dərəcədə əməl olunur?
Media hüququ eksperti Ələsgər Məmmədli Novator.az-a deyib ki, siyasi partiyalar qanununun 8-ci maddəsinə əsasən, dövlət mətbuatı orqanlarının işçiləri bütün seçki, xidmət və ya iş dövründə siyasi partiyalarda üzvlüyünü dayandırmalıdırlar: “Burada işçilər ifadəsini bütün fəaliyyət göstərən şəxslər olaraq anlamaq lazımdır. Məsələn, dövlət qəzetində işləyənlər əslində partiyalı olmamalıdır. Təəssüf ki, bu tələbə əməl edilmir. Dövlət nəşrlərinin rəsmiləri hakim Yeni Azərbaycan Partiyasının üzvü, hətta seçkidə namizədi olur. Bu, qanunvericiliyin tələbini pozmaqdır.
Əvvəllər də bu prinsiplərin pozulduğu müşahidə olunub. İctimai Televiziya və Radio Yayımları Şirkətinin Yayım Şurasının üzvləri partiyalı ola bilməz. Lakin Yeni Azərbaycan Partiyasının nümayəndəsi Yayım Şurasının üzvü olanda partiyalılığını saxlamışdı.
Başqa bir məqam da var. Seçki Məcəlləsinin tələbinə əsasən, vəzifəli şəxslər, teleradio verilişləri və kütləvi informasiya vasitələri redaksiyalarında işləyən jurnalistlər və yaradıcı işçilər qeydə alınmış namizəddirlərsə, seçkinin gedişinin kütləvi informasiya vasitələri ilə işıqlandırılmasında iştirak edə bilməzlər. Bu qadağaya da çox vaxt məhəl qoyulmur”.
