Vergi pozuntuları, tədbirlər
2019-cu ildə Vergilər Nazirliyi yanında Vergi Cinayətlərinin İbtidai Araşdırılması Baş İdarəsində 320 cinayət işi başlanıb. Vergiler.az-ın məlumatına görə, əvvəlki ildən qalmış işlər də nəzərə alınmaqla 293 cinayət işi üzrə ibtidai istintaq tamamlanıb: “Onların 167-nin icraatına xitam verilib, 149 nəfər barəsində 126 cinayət işi məhkəməyə göndərilib.
İcraatına xitam verilən 167 cinayət işindən 82 iş üzrə vergi ödəyiciləri yayındırılmış vergiləri ibtidai istintaq zamanı tamamilə ödəyiblər. 22 milyon 999,2 min manat məbləğində ziyanın dövlət büdcəsinə ödənilməsi təmin edilib.
Vergi borcu üzrə cinayət tərkibi yaradan və yerli vergi orqanlarından daxil olmuş materiallarla bağlı görülmüş preventiv tədbirlər nəticəsində dövlət büdcəsinə 28,8 milyon manat vəsait ödənib.
Barələrində axtarış elan edilmiş 21 nəfər tutularaq təhvil verilib, 10 nəfər barəsində həbs qətimkan tədbiri seçilib, ibtidai istintaqdan yayınan 355 nəfər dindirilmə üçün məcburi qaydada gətirilib, 1260 şəxs tapılaraq istintaqa gətirilib.
İl ərzində müxtəlif sahələr üzrə fəaliyyət göstərən 374 vergi ödəyicisində 556 vergi nəzarəti tədbirləri həyata keçirilib. 43 vergi ödəyicisinə məxsus obyektlərdə əhali ilə pul hesablaşmalarının aparılması qaydalarına riayət edilməməsi, 33 şəxsin vergi orqanında uçota alınmadan sahibkarlıq fəaliyyəti ilə məşğul olması, 178 vergi ödəyicisinin 2296 nəfər fiziki şəxsi əmək müqaviləsi hüquqi qüvvəyə minmədən işlərin (xidmətlərin) yerinə yetirilməsinə cəlb etdiyi aşkar olunub”.
2019-cu il oktyabrın 23-də Vergilər Nazirliyi, Əmlak Məsələləri Dövlət Komitəsi və Antiinhisar və İstehlak Bazarına Nəzarət Dövlət Agentliyi müvafiq xidmətlər statusunda İqtisadiyyat Nazirliyinin strukturuna daxil edilib.
