Seçki bülletenləri çap olunur
Mərkəzi Seçki Komissiyası fevralın 9-da keçiriləcək parlament seçkisinin bülletenlərinin çapına başlayıb. Rəsmi xəbərdə bildirilir ki, Mərkəzi Seçki Komissiyasının sədri Məzahir Pənahov yanvarın 27-də Milli Məclisin mətbəəsinə baxış keçirərək çap prosesinin gedişi ilə tanış olub.
5 milyon 387 min 600 seçki bülleteninin çap olunması nəzərdə tutulub. Çap prosesinin mühafizəsini Xüsusi Dövlət Mühafizə Xidməti həyata keçirir.
Son məlumata görə, deputatlığa 1374 nəfər namizəd var.
125 dairədə keçiriləcək 9 fevral seçkisinə 20 partiya qoşularaq Mərkəzi Seçki Komissiyasına səlahiyyətli nümayəndələr göndərib: Yeni Azərbaycan Partiyası, Ümid Partiyası, Vətəndaş Həmrəyliyi Partiyası, Bütöv Azərbaycan Xalq Cəbhəsi Partiyası, Böyük Quruluş Partiyası, Milli Dirçəliş Hərəkatı Partiyası, Milli İstiqlal Partiyası, Demokrat Partiyası, Böyük Azərbaycan Partiyası, Vahid Azərbaycan Partiyası, Ana Vətən Partiyası, Təkamül Partiyası, Müsavat Partiyası, Sosial Rifah Partiyası, Vəhdət Partiyası, Demokratik İslahatlar Partiyası, Liberal Demokrat Partiyası, Demokratik Maarifçilik Partiyası, Müasir Müsavat Partiyası, Vətəndaş və İnkişaf Partiyası.
Yanvarın 17-də başlanan təşviqat fevralın 8-i səhər saat 8-də dayandırılacaq.
Qanuna görə, seçkidə iştirak edən seçicilərin ən çox səsini toplamış namizəd birmandatlı seçki dairəsi üzrə deputat seçilmiş hesab edilir.
