Qubad İbadoğludan xəbərdarlıq və təkliflər
Çində təhlükəli korona virusunun yayılması Azərbaycanın bu ölkə ilə əlaqələrinə də təsir edəcək. İqtisadçı, Demokratiya və Rifah Hərəkatının sədri Qubad İbadoğlu belə düşünür.
Novator.az-ın məlumatına görə, Qubad İbadoğlu özünün “Facebook” səhifəsində yazır ki, ilk və daha ciddi təsir ticarət münasibətlərində duyulacaq: “2019-cu ildə Çin Azərbaycanın idxalda üçüncü böyük ticarət tərəfdaşı olub. Ötən il Azərbaycandan Çinə 752,2 milyon dollarlıq mal göndərilib, oradan 1 milyard 432 milyon dollarlıq mal gətirilib. Çinin ümumi idxalda payı 10,5 faizə çatıb.
Yaxın zamanlarda epidemiyanın qarşısı alınmasa, Azərbaycanda Çin mənşəli malların qıtlığı yarana və bu da istehlak bazarında qiymətlərin artımına gətirib çıxara bilər.
Başqa bir yandan epidemiya ilə bağlı proseslər son illər Çində yavaşıyan iqtisadi artımı daha da aşağı salacaq, məcmu tələbi və təklifi azaldacaq. Təbii ki, bu da Çində alıcılıq qabiliyyətinin azalmasına gətirib çıxaracaq. Çində enerji daşıyıcılarına tələbin azalması dünya bazarında neftin və qazın qiymətlərinin aşağı düşməsinə gətirəcək, Azərbaycan iqtisadiyyatı bundan mənfi yöndə təsirlənəcək”.
Qubad İbadoğlu həmçinin qeyd edir ki, Azərbaycanın Təhsil Nazirliyi ilə Çinin Təhsil Nazirliyi arasında əməkdaşlıq sazişinə uyğun olaraq 100-dən çox Azərbaycan vətəndaşı Çinin ali məktəblərində təhsil alır: “Onların təhlükəsizliyi ilə əlaqədar təcili işlər görülməli, tələbələr müvəqqəti olaraq ölkəyə qaytarılmalıdır.
Çindən Azərbaycana səfər edənlərin sərhəd məntəqələrində tibbi yoxlamaları təşkil edilməlidir ki, virusun Azərbaycana girişinin qarşısı alınsın. Çinə səfər planlaşdıran azərbaycanlı iş adamlarını isə səfərlərini təxirə salmağa çağırıram. Risk etməyə dəyməz!”
