Görüş yeri Cenevrə
Azərbaycan Xarici İşlər Nazirliyinin Mətbuat Xidməti İdarəsi məlumat yayıb. Rəsmi açıqlamaya görə, nazir Elmar Məmmədyarov yanvarın 29-u İsveçrənin Cenevrə şəhərində ATƏT-in Minsk qrupunun həmsədrləri ilə görüşəcək. Yanvarın 30-da isə nazirin ermənistanlı həmkarı Zöhrab Mnasakanyanla bir araya gələcəyi bildirilir. Hər iki görüşdə Dağlıq Qarabağ münaqişəsinin dinc həlli müzakirə olunacaq.
1988-ci ildə Ermənistan Azərbaycanın Dağlıq Qarabağ vilayətini ələ keçirmək üçün təcavüzə başlayıb. 1991-ci ildə ermənilər Dağlıq Qarabağı “müstəqil dövlət” elan edib. 1994-cü ildə atəşkəslə dayanan işğalçı müharibədə Dağlıq Qarabağ bölgəsi (Xankəndi şəhəri, Şuşa, Xocalı rayonları tam, Xocavənd rayonu, keçmiş Ağdərə rayonu qismən) və onun ətrafındakı bölgələr (Laçın, Kəlbəcər, Qubadlı, Zəngilan rayonları tam, Ağdam, Füzuli, Cəbrayıl rayonları qismən) ermənilərin əlinə keçib.
Dağlıq Qarabağ münaqişəsinin dinc yolla tənzimlənməsi ilə məşğul olan ATƏT-in Minsk qrupu 1992-ci ildə yaradılıb. Bu quruma həmsədrlər ABŞ, Fransa, Rusiyadan əlavə Türkiyə, Belarus, İtaliya, Almaniya, İsveç, Finlandiya, eləcə də Azərbaycanla Ermənistan daxildir.
Hazırda həmsədr postlarını İqor Popov (Rusiya), Stefan Viskonti (Fransa), Endrü Skofer (ABŞ) tuturlar.
