Seçki yarışında 1400 nəfər qalır
Fevralın 9-na təyin edilmiş parlament seçkisində namizədliyi qeydə alınmış 1637 nəfərdən 237-si marafonda iştirakını dayandırıb. APA-nın 24 yanvar məlumatına görə, hazırda deputatlığa 1400 nəfər namizəd var.
“Report” isə bildirir ki, deputat Hacı Salayev 44 saylı Sumqayıt-Xızı seçki dairəsindən namizədliyini geri götürüb. Bununla da 9 fevral seçkisində iştirak edən Milli Məclis üzvlərinin sayı 81-ə düşüb.
125 dairədə keçiriləcək 9 fevral seçkisinə 20 partiya qoşularaq Mərkəzi Seçki Komissiyasına səlahiyyətli nümayəndələr göndərib: Yeni Azərbaycan Partiyası, Ümid Partiyası, Vətəndaş Həmrəyliyi Partiyası, Bütöv Azərbaycan Xalq Cəbhəsi Partiyası, Böyük Quruluş Partiyası, Milli Dirçəliş Hərəkatı Partiyası, Milli İstiqlal Partiyası, Demokrat Partiyası, Böyük Azərbaycan Partiyası, Vahid Azərbaycan Partiyası, Ana Vətən Partiyası, Təkamül Partiyası, Müsavat Partiyası, Sosial Rifah Partiyası, Vəhdət Partiyası, Demokratik İslahatlar Partiyası, Liberal Demokrat Partiyası, Demokratik Maarifçilik Partiyası, Müasir Müsavat Partiyası, Vətəndaş və İnkişaf Partiyası.
Yanvarın 17-də başlanan təşviqat fevralın 8-i səhər saat 8-də dayandırılacaq.
Qanuna görə, seçkidə iştirak edən seçicilərin ən çox səsini toplamış namizəd birmandatlı seçki dairəsi üzrə deputat seçilmiş hesab edilir.
