Rusiya: ana qanuna nələr təklif olunur?
Rusiya parlamentinin aşağı palatası – Dövlət Duması ölkə konstitusiyasına dəyişikliklər layihəsini ikinci oxunuşda fevralın 11-də müzakirə edəcək. Prezident Vladimir Putinin təklifi olan layihə ilk oxunuşdan yanvarın 23-də keçib.
Novator.az-ın məlumatına görə, layihə ölkədə azı 25 il daimi yaşamamış, başqa ölkənin vətəndaşı olmuş və ya xaricdə daimi yaşamaq hüququ almış şəxsin Rusiya prezidenti postuna namizədliyinə, həmçinin iki dəfədən artıq prezident seçilməyə yasaq nəzərdə tutur.
Digər təklifə əsasən, dövlət qulluqçuları başqa ölkənin vətəndaşı ola və xaricdə daimi yaşamaq hüququ əldə edə bilməz.
Layihəyə görə, baş naziri, baş nazirin müavinlərini və federal nazirləri Dövlət Duması təyin edəcək.
Parlamentin yuxarı palatası – Federasiya Şurası güc strukturlarının başçılarının təyinatına razılıq vermək, Konstitusiya Məhkəməsi və Ali Məhkəmənin hakimlərini işdən çıxarmaq, prezidentin təqdimatı ilə baş prokuroru və onun müavinlərini təyin etmək səlahiyyəti alır.
Layihədə prezidentin qanunlara veto qoymasını çətinləşdirmək, Konstitusiya Məhkəməsinə və Dövlət Şurasına yeni səlahiyyətlər vermək təklifləri də var.
Başqa təkliflərə əsasən, pensiyaları mütəmadi indeksləşdirmə qaydası, həmçinin minimum əməkhaqqının ölkə üzrə yaşayış minimumundan aşağı olmasının yolverilməzliyi konstitusiyaya norma kimi salınır.
Layihə parlamentdən keçəndən sonra ümumxalq səsverməsinə – referenduma çıxarılacaq.
