Bakılı oğlanın təltifi
Prezident İlham Əliyev Rusiyanın TASS informasiya agentliyinin baş direktorunun birinci müavini Mixail Qusmanı “Şərəf” ordeni ilə təltif edib. Təltif Azərbaycanla Rusiya arasında qarşılıqlı əlaqələrin inkişafında uzunmüddətli səmərəli fəaliyyətlə əsaslandırılıb.
Mixail Qusmana 70 illik yubileyi münasibətilə göndərdiyi məktubda dövlət başçısı yazır: “Geniş dünyagörüşünüz, işgüzar və şəxsi keyfiyyətləriniz Sizə haqlı olaraq nüfuz və hörmət qazandırıb. Azərbaycanda Sizi sevir və xüsusi dəyərləndirirlər. Siz uzun müddətdir Azərbaycan-Rusiya mədəni əlaqələrinin genişlənməsinə böyük töhfə verir, bununla da dostluq münasibətlərinin inkişafına və möhkəmlənməsinə kömək edirsiniz”.
Novator.az bildirir ki, Mixail Qusman 1950-ci il yanvarın 23-də Bakı şəhərində doğulub. Azərbaycan Pedaqoji Xarici Dillər İnstitutunu və Bakı Ali Partiya Məktəbini bitirib. 1973-1986-cı illərdə Azərbaycan Gənclər Təşkilatları Komitəsi sədrinin müavini, 1986-1991-ci illərdə SSRİ Gənclər Təşkilatları Komitəsinin informasiya şöbəsinin müdiri, 1991-1995-ci illərdə “İnfomol” informasiya əməkdaşlığı qurumunun direktoru, 1995-1998-ci illərdə “ANKOM – TASS” beynəlxalq təhlil agentliyinin vitse-prezidenti olub.
1998-ci ildən TASS-da çalışır, 1999-cu ildən baş direktorun birinci müavinidir.
Azərbaycanın “Şöhrət” və “Dostluq” ordenləri laureatıdır.
