Hər adama 8247 manat düşür
Dövlət Statistika Komitəsi 2019-cu ilin makroiqtisadi göstəricilərini açıqlayıb. Novator.az bildirir ki, hesabata görə, 2019-cu ildə ölkədə 81,7 milyard manatlıq və ya 2018-ci illə müqayisədə 2,2 faiz çox ümumi daxili məhsul (ÜDM) istehsal olunub, iqtisadiyyatın qeyri neft-qaz sektorunda istehsal olunmuş əlavə dəyər 3,5 faiz, neft-qaz sektorunda 0,4 faiz artıb: “Əlavə dəyərin 41,4 faizi sənaye, 10 faizi ticarət; nəqliyyat vasitələrinin təmiri, 7,3 faizi tikinti, 6 faizi nəqliyyat və anbar təsərrüfatı, 5,7 faizi kənd təsərrüfatı, meşə təsərrüfatı və balıqçılıq, 2,4 faizi turistlərin yerləşdirilməsi və ictimai iaşə, 1,8 faizi informasiya və rabitə sahələrində, 16,7 faizi digər sahələrdə istehsal edilib. Məhsula və idxala xalis vergilər ÜDM-in 8,7 faizinə bərabər olub”.
Əhalinin hər nəfərinə düşən ÜDM 8247 manat göstərilir.
Rəsmi məlumata əsasən, 2018-ci illə müqayisədə kənd təsərrüfatının ümumi məhsulu 7,2 faiz, o cümlədən bitkiçilik məhsullarının istehsalı 11,7 faiz, heyvandarlıq məhsullarının istehsalı 3,5 faiz yüksəlib.
İnvestisiya qoyuluşunda 2018-ci illə müqayisədə 2,3 faiz azalma qeydə alındığı, qeyri neft-qaz sektoruna yönəldilən vəsaitin həcminin isə 1,9 faiz artdığı bildirilir.
Qeyd olunur ki, nəqliyyat sektorunda yük daşınması 2018-ci illə müqayisədə 2,2 faiz, sərnişin daşınması 2,7 faiz, informasiya və rabitə xidmətlərinin həcmi 15,9 faiz artıb.
Yanvar-noyabr aylarında muzdla işləyənlərin orta aylıq nominal əməkhaqqının 2018-ci ilin müvafiq dövrünə nisbətən 15,4 faiz artaraq 623,1 manata çatdığı, əhalinin gəlirlərinin il ərzində nominal ifadədə 7,4 faiz çoxaldığı vurğulanır.
