Davos ziyarəti, ilk günün görüşləri
Dünya İqtisadi Forumunun illik toplantısında iştirak etmək üçün İsveçrəyə gedən prezident İlham Əliyev yanvarın 20-si Davosda “VTB Bank”ın prezidenti-İdarə Heyətinin sədri Andrey Kostinlə görüşüb. Dövlət başçısı “VTB Bank”ın Azərbaycan iqtisadiyyatının real sektoruna kredit qoyuluşunun artırılmasını təklif edib. Andrey Kostin təklifə müsbət yanaşdığını vurğulayıb. Söhbət zamanı Azərbaycanla Rusiya arasında ticarət dövriyyəsinin artan istiqamətdə davam etməsinin və daha da sürətləndirilməsinin vacibliyi qeyd olunub.
AZƏRTAC-ın məlumatına görə, həmin gün İlham Əliyev “Carlyle Group” şirkətinin həmtəsisçisi Devid Rubenşteynlə də bir araya gəlib. Görüşdə “Carlyle Group” şirkəti ilə Azərbaycan Dövlət Neft Fondu arasında əməkdaşlığın gələcək istiqamətlərindən söz açılıb.
“CİSCO” şirkətinin icraçı vitse-prezidenti və baş maliyyə direktoru Kelli Kramerlə görüşdə isə qeyd olunub ki, şirkət hazırda Azərbaycanda prioritet istiqamətlər üzrə layihələr reallaşdırır, bu layihələrin bir çoxunun ilkin mərhələləri həyata keçirilib.
İlham Əliyev “CİSCO” şirkətinin Azərbaycan üçün önəmli tərəfdaş olduğunu qeyd edib, deyib ki, bu şirkət üçün Azərbaycanda çox böyük biznes potensialı var.
