Müsavat 60 dairədə 64 namizədlə yarışır
Fevralın 9-da keçiriləcək parlament seçkisinə qatılan Müsavat Partiyasının 60 seçki dairəsində 64 namizədi qeydə alınıb. Dörd dairədə eyni vaxtda iki müsavatçı mübarizə aparır.
Müsavat başqanı Arif Hacılı seçki yarışına 15 saylı Yasamal dairəsindən, sabiq başqan İsa Qəmbər 19 saylı Nərimanov dairəsindən qatılıb.
Novator.az-ın məlumatına görə, Arif Hacılı özünün “Facebook” səhifəsində bəyan edib ki, Müsavatın namizədi olmayan dairələrdə müxalif blokların namizədlərinə, müstəqil namizədlərə, gənc fəallara dəstək veriləcək.
Seçki şüarı “Gələcəyini səslə dəyiş” müəyyən olunub.
Parlament seçkisinin təşviqat raundu yanvarın 17-dən fevralın 8-dək davam edəcək.
Mərkəzi Seçki Komissiyasının 16 yanvar hesabatına görə, parlament seçkisinə qatılan iddiaçıların 1534-ü rəsmən qeydə alınıb (Namizədlərin qeydiyyatı).
Milli Məclisin birmandatlı dairələrdən seçilən 125 deputatı var.
9 fevral seçkisində iştirak edən 20 partiya Mərkəzi Seçki Komissiyasında səlahiyyətli nümayəndələrini rəsmiləşdirib: Yeni Azərbaycan Partiyası, Ümid Partiyası, Vətəndaş Həmrəyliyi Partiyası, Bütöv Azərbaycan Xalq Cəbhəsi Partiyası, Böyük Quruluş Partiyası, Milli Dirçəliş Hərəkatı Partiyası, Milli İstiqlal Partiyası, Demokrat Partiyası, Böyük Azərbaycan Partiyası, Vahid Azərbaycan Partiyası, Ana Vətən Partiyası, Təkamül Partiyası, Müsavat Partiyası, Sosial Rifah Partiyası, Vəhdət Partiyası, Demokratik İslahatlar Partiyası, Liberal Demokrat Partiyası, Demokratik Maarifçilik Partiyası, Müasir Müsavat Partiyası, Vətəndaş və İnkişaf Partiyası.
