Korrupsiyaya Qarşı Mübarizə Baş İdarəsinin hesabatı
Baş Prokuror yanında Korrupsiyaya Qarşı Mübarizə Baş İdarəsi 2019-cu ilin hesabatını verib. Rəsmi məlumata görə, ötən il idarə vətəndaşların 8447 müraciətinə baxıb, həmçinin 317 cinayət xarakterli materialı araşdırıb: “Həmin materialların 231-i üzrə cinayət işi başlanıb, 86 material üzrə digər prokuror təsir aktları tətbiq edilib. “161-Qaynar xətt” əlaqə mərkəzinə daxil olmuş, əsasən yerli icra hakimiyyətləri, səhiyyə, sosial müdafiə, təhsil, bələdiyyə və digər sahələri əhatə edən 3849 müraciət üzrə görülmüş tədbirlər nəticəsində vətəndaşların pozulmuş hüquqları bərpa olunub, 19 halda cinayət işləri başlanıb, habelə aşkar edilmiş qanun pozuntularının aradan qaldırılması məqsədilə müvafiq təşkilatlara təqdimatlar göndərilib, 47 vəzifəli şəxs intizam məsuliyyətinə alınıb.
Əməliyyat tədbirləri nəticəsində 19 şəxs cinayət başında yaxalanıb, 17 nəfər axtarışda olan şəxs saxlanıb, korrupsiya hüquqpozmaları barədə əldə edilmiş məlumatlar əsasında 49 cinayət işi başlanıb.
2019-ci il ərzində 497 şəxs barəsində 310 cinayət işinin istintaqı tamamlanaraq məhkəmələrə göndərilib. 101 şəxs barəsində 59 iş qulluq mövqeyindən istifadə etməklə mənimsəmə və israf etmə, 69 şəxs barəsində 55 iş qulluq mövqeyindən istifadə etməklə dələduzluq, 36 şəxs barəsində 18 iş vəzifə səlahiyyətlərindən sui-istifadə etmə, 52 şəxs barəsində 20 iş rüşvət alma (passiv rüşvətxorluq), 68 şəxs barəsində 43 iş rüşvət vermə (aktiv rüşvətxorluq) və şəxsi rüşvət verməyə təhrik etmə, qalanları isə digər korrupsiya cinayətləri ilə bağlı olub.
Pul vəsaitlərini və ya digər əmlakı leqallaşdırma faktları üzrə 7 cinayət işinin istintaqı tamamlanıb, hüquqi şəxslərə cinayət-hüquqi tədbirlərin tətbiq olunması barədə 3 cinayət işi üzrə 3 hüquqi şəxs barədə qərar qəbul olunub, hüquqi şəxslər və onların rəhbərliyi məhkəmə məsuliyyətinə verilib.
Məhkəmələrə göndərilmiş cinayət işləri üzrə 83,2 milyon manat məbləğində maddi ziyandan ibtidai araşdırma mərhələsində 21,8 milyon manatın ödənilməsi təmin edilib, həmçinin qalan ziyanın ödənməsini təmin etmək məqsədilə 40,3 milyon manat dəyərində qiymətləndirilən əmlak üzərinə həbs qoyulub, ümumilikdə vurulmuş maddi ziyanın 74,7 faizinin ödənməsi təmin edilib.
Araşdırmalar nəticəsində yol verilmiş qanun pozuntularının aradan qaldırılması və gələcəkdə təkrarlanmaması məqsədilə müxtəlif dövlət qurumları və vəzifəli şəxslərə 118 təqdimat göndərilib, 35 halda vətəndaş və ya vəzifəli şəxslərə rəsmi xəbərdarlıq edilib”.
