Xarici ticarətin illik hesabatı
2019-cu ilin xarici ticarət statistikası açıqlanıb. Novator.az bildirir ki, Dövlət Gömrük Komitəsinin yekun hesabatına görə, ötən il Azərbaycanın xarici ticarət əməliyyatlarının həcmi 33,3 milyard dollar olub, 19,6 milyard dollarlıq ixrac, 13,7 milyard dollarlıq idxal qeydə alınıb.
195 ölkə ilə ticarət əməliyyatı aparıldığı, gömrük orqanlarının büdcəyə 4 milyard 408,6 milyon manat ödədiyi vurğulanır.
Statistikaya əsasən, ixracın 6 faizi MDB ölkələrinin, 53,5 faizi Avropa İttifaqı ölkələrinin, 40,5 faizi digər ölkələrin payına düşüb.
İdxalda MDB-nin payı 25,1 faiz, Avropa İttifaqının payı 17,8 faiz, digər ölkələrin payı 57,1 faiz göstərilir.
Rəsmi hesabata əsasən, il ərzində əsas tərəfdaş İtaliya olub, bu ölkə ilə ticarət dövriyyənin 18 faizi həcmində rəsmiləşib.
İxracda əsas ölkə İtaliya (28,7 faiz), idxalda Rusiyadır (16,7 faiz).
Hesabata görə, ixracın 75,4 faizi xam neft və xam neft məhsulları, 2,3 faizi neft məhsulları, 12 faizi təbii qaz, 3 faizi meyvə-tərəvəz; idxalın 19,4 faizi maşın, mexanizm, elektrik aparatları, avadanlıqlar və onların hissələri, 12 faizi yeyinti məhsulları, 9,1 faizi nəqliyyat vasitələri və onların hissələri, 7,6 faizi qara metallar və onlardan hazırlanan məmulatlar kimi rəsmiləşib.
