Bəxtiyar Hacıyevi təhdid edən şəxsin tutulduğu bildirilir
İctimai fəal, fevralın 9-da keçiriləcək parlament seçkisində 29 saylı Səbail dairəsindən namizədliyini irəli sürmüş Bəxtiyar Hacıyevi təhdid edən şəxsin tutulduğu bildirilir.
Bakı Şəhər Baş Polis İdarəsinin məlumatına görə, Yasamal polisinin əməkdaşları saxta sosial şəbəkə profillərindən özünü ABŞ vətəndaşı Turan Elmar İsmayıl oğlu kimi təqdim edən, əslində Suraxanı rayonunda qeydiyyatda olan 1989-cu il təvəllüdlü Elman Bağırovu saxlayıblar.
Məlum olub ki, Elman Bağırov Cinayət Məcəlləsinin 182.2.2 (hədə-qorxu ilə tələb etmə, təkrar törədildikdə) maddəsi ilə cinayət işi üzrə axtarışdaymış.
Hazırda faktla bağlı araşdırmaların davam etdirildiyi vurğulanır.
Bir neçə gün qabaq Bəxtiyar Hacıyev bəyan etmişdi ki, “Votsap” şəbəkəsi vasitəsilə zəng edib onu məhv etməklə hədələyirlər. Bununla əlaqədar Bəxtiyar Hacıyev Daxili İşlər Nazirliyinin 102 xidmətinə məlumat vermişdi.
1982-ci il təvəllüdlü Bəxtiyar Hacıyev Bakı Dövlət Universitetinin və ABŞ-ın Harvard Universitetinin məzunudur. 2011-2012-ci illərdə hərbi çağırışdan yayınma ittihamı ilə həbsdə yatıb.
