“Seçki – 2020” mərkəzi işə düşüb
Mərkəzi Seçki Komissiyasının Müstəqil Media Mərkəzi işə düşüb. “Seçki – 2020” adlanan mərkəz Bakıdakı “Hilton” hotelinin “ONYX” zalında yerləşir (telefon: (+99412) 565-50-29 (30, 31), elektron poçt: [email protected]).
Rəsmi məlumata görə, mərkəz müasir informasiya-kommunikasiya texnologiyaları, zəruri texniki avadanlıqlar və ödənişsiz internetlə təchiz olunub, orada mətbuat konfransları keçirmək və bəyanatlar vermək mümkündür.
Müstəqil Media Mərkəzinin Azərbaycan, rus və ingilis dillərində fəaliyyət göstərən www.secki-2020.az internet səhifəsi var.
Mərkəzi Seçki Komissiyasının son hesabatına görə, fevralın 9-na təyin edilmiş parlament seçkisinə 2431 iddiaçı qatılıb, onların 1047-si rəsmən qeydə alınıb (Namizədlərin qeydiyyatı).
Milli Məclisin birmandatlı dairələrdən seçilən 125 deputatı var. 18 yaşına çatmış Azərbaycan vətəndaşı deputat seçilə bilər. Namizədin müdafiəsi üçün onun irəli sürüldüyü seçki dairəsinin ərazisində seçicilərin azı 450 imzası toplanmalıdır.
9 fevral seçkisində iştirak edən 20 partiya Mərkəzi Seçki Komissiyasında səlahiyyətli nümayəndələrini rəsmiləşdirib: Yeni Azərbaycan Partiyası, Ümid Partiyası, Vətəndaş Həmrəyliyi Partiyası, Bütöv Azərbaycan Xalq Cəbhəsi Partiyası, Böyük Quruluş Partiyası, Milli Dirçəliş Hərəkatı Partiyası, Milli İstiqlal Partiyası, Demokrat Partiyası, Böyük Azərbaycan Partiyası, Vahid Azərbaycan Partiyası, Ana Vətən Partiyası, Təkamül Partiyası, Müsavat Partiyası, Sosial Rifah Partiyası, Vəhdət Partiyası, Demokratik İslahatlar Partiyası, Liberal Demokrat Partiyası, Demokratik Maarifçilik Partiyası, Müasir Müsavat Partiyası, Vətəndaş və İnkişaf Partiyası.
Təşviqat yanvarın 17-də başlanır.
