Təşviqat nöqtələri
Mərkəzi Seçki Komissiyası fevralın 9-na təyin edilmiş parlament seçkisində təşviqat görüşü yerlərinin siyahısını açıqlayıb. Şəhər və rayonlarda 118 seçki dairəsi üzrə 128 açıq, 128 qapalı yer müəyyən edilib (Siyahı).
Açıq məkanlar arasında son vaxtlar Bakı Şəhər İcra Hakimiyyətinin mitinqlər üçün ayırdığı meydan – “Neftçi” İdman Klubu Birliyinin Qaradağ Təlim-İdman Bazasının Qaradağ rayonunun Lökbatan qəsəbəsindəki stadionu da var.
Naxçıvan Muxtar Respublikası üzrə müəyyən edilmiş açıq və qapalı yerlər bölgənin öz mediasında dərc olunub.
Milli Məclisin birmandatlı dairələrdən seçilən 125 deputatı var. Mərkəzi Seçki Komissiyasının son hesabatına görə, parlament seçkisinə 2416 iddiaçı qatılıb, onların 689-u rəsmən qeydə alınıb. İddiaçıların müvafiq sənədləri dairə seçki komissiyalarına təqdim etmək vaxtı yanvarın 10-u axşam saat 6-da bitir.
9 fevral seçkisində iştirak edən 20 partiya Mərkəzi Seçki Komissiyasında səlahiyyətli nümayəndələrini rəsmiləşdirib: Yeni Azərbaycan Partiyası, Ümid Partiyası, Vətəndaş Həmrəyliyi Partiyası, Bütöv Azərbaycan Xalq Cəbhəsi Partiyası, Böyük Quruluş Partiyası, Milli Dirçəliş Hərəkatı Partiyası, Milli İstiqlal Partiyası, Demokrat Partiyası, Böyük Azərbaycan Partiyası, Vahid Azərbaycan Partiyası, Ana Vətən Partiyası, Təkamül Partiyası, Müsavat Partiyası, Sosial Rifah Partiyası, Vəhdət Partiyası, Demokratik İslahatlar Partiyası, Liberal Demokrat Partiyası, Demokratik Maarifçilik Partiyası, Müasir Müsavat Partiyası, Vətəndaş və İnkişaf Partiyası.
Təşviqat yanvarın 17-də başlanır.
