Ukrayna qəzanı dörd versiya üzrə araşdırır
Ukraynanın Milli Təhlükəsizlik və Müdafiə Şurası yanvarın 8-də baş vermiş təyyarə qəzası ilə bağlı ilkin versiyalarını açıqlayıb.
Novator.az bildirir ki, Ukraynaya məxsus “Boinq 737” sərnişin təyyarəsi İranda qəzaya uğrayıb. Paytaxt Tehrandan Kiyevə uçan sərnişin təyyarəsi yanvarın 8-i səhər tezdən İmam Xomeyni beynəlxalq aeroportundan qalxandan bir neçə dəqiqə sonra yerə düşüb. Təyyarədə 176 nəfər (167 sərnişin, 9 heyət üzvü) varmış. Onların hamısı həlak olub.
Yanvarın 9-da Ukraynanın Milli Təhlükəsizlik və Müdafiə Şurası bəyan edib ki, qəza ilə bağlı dörd versiya araşdırılır: zenit raketi ilə vurulma; təyyarənin göyərtəsində terror aktı nəticəsində partlayış; pilotsuz aparat və ya başqa uçan obyektlə toqquşma; texniki nasazlıq üzündən mühərrikin yanaraq sıradan çıxması.
İran Mülki Aviasiya Təşkilatının yaydığı məlumatda isə bildirilir ki, qəzadan az əvvəl təyyarə aeroport istiqamətinə dönüb və yerə düşməzdən əvvəl alışıb.
Qəzada həlak olanlar İran, Ukrayna, Kanada, Almaniya, İsveç və Əfqanıstan vətəndaşlarıdır.
