Daşqın Ağalarlı: Norveçə, ya Azərbaycana?
Polşada tutulmuş azərbaycanlı ictimai fəal Daşqın Ağalarlı yanvarın 8-də zaminə buraxılıb.
Novator.az bildirir ki, 1966-cı il təvəllüdlü Daşqın Ağalarlı indiki Neft və Sənaye Universitetinin məzunudur. Azərbaycan Xalq Cəbhəsinin öncül fəallarından biri kimi tanınıb. 1992-1993-cü illərdə Dövlət Yanacaq Komitəsi sədrinin birinci müavini postunu tutub.
Son illər Daşqın Ağalarlı Gürcüstanda yaşayıb. Azərbaycanın hüquq mühafizə orqanları onu vergi ödəməkdən yayınma ittihamı ilə İnterpol xətti ilə axtarışa verib. 2014-cü il martın 3-də Daşqın Ağalarlı Gürcüstanda tutularaq 6 ay həbsdə saxlanıb.
2017-ci ilin martında Daşqın Ağalarlının Gürcüstanda yaşamaq hüququ ləğv olunub. 2018-ci ilin martında Gürcüstanı tərk edən Daşqın Ağalarlı 2019-cu ilin sentyabr ayında Norveçdən sığınacaq alıb.
Bu il yanvarın 6-da Daşqın Ağalarlı Polşanın Qdansk şəhərinin aeroportunda tutulub. Yanvarın 8-də zaminə buraxılan fəalın vəkili Tomaş Snarski “Azadlıq” radiosuna deyib ki, ekstradisiya ilə bağlı proses uzun çəkəcək: “Biz Polşa hökuməti ilə əməkdaşlığı davam etdirəcək, durumu aydınlaşdırmağa çalışacaq, Daşqın Ağalarlının təhlükəsiz şəkildə Norveçə dönməsinə çalışacağıq”.
Daşqın Ağalarlı vergi borcu ittihamının əsassız olduğunu, Azərbaycan hakimiyyətini davamlı tənqid etdiyi üçün təzyiqə məruz qaldığını bildirir.
