Bakıdan Cocuq Mərcanlıya avtobus reysi
Yanvarın 9-da Bakı avtovağzalından Cəbrayılın Cocuq Mərcanlı kəndinə ilk avtobus reysi açılıb. AZƏRTAC xəbər verir ki, iki müntəzəm və dörd qeyri-müntəzəm xətt üzrə ümumilikdə 6 avtobus xidmətdə olacaq. Müntəzəm marşrut xətti üzrə Bakı-Sabirabad-Saatlı-İmişli-Daşburun-Horadiz-Cocuq Mərcanlı, qeyri-müntəzəm xətt üzrə Bakı-Cocuq Mərcanlı trayektoriyası əhatə olunacaq.
Ermənistan silahlı birləşmələri Cocuq Mərcanlını 1993-cü ilin oktyabrında tutub. 1994-cü ilin yanvarında Azərbaycan Ordusu kəndi işğaldan azad edib. 2016-cı ilin aprel ayından ordu ətraf əraziləri nəzarətə götürüb və Cocuq Mərcanlı kəndində insanların təhlükəsiz yaşaması mümkün olub, evlər, təhsil, səhiyyə və mədəniyyət obyektləri, məscid tikilib, kommunikasiya xətləri çəkilib.
2019-cu ildə Sumqayıt, Mingəçevir və Gəncədən Cocuq Mərcanlıya avtobus xətləri istifadəyə verilib.
