Müsavatın 6 namizədi qeydə alınıb
Fevralın 9-da keçiriləcək parlament seçkisinə qatılan Müsavat Partiyasının hələlik 6 namizədi rəsmən qeydə alınıb. Yanvarın 8-də partiyanın mətbuat xidmətindən Novator.az-a bildiriblər ki, Müsavatın ümumilikdə 75-ə yaxın namizədi qeydiyyat üçün tələb olunan sənədləri dairə seçki komissiyalarına təhvil verib.
Azərbaycan parlamenti – Milli Məclis birmandatlı dairələrdən seçilən 125 deputatdan ibarətdir.
Namizədin müdafiəsi üçün onun irəli sürüldüyü seçki dairəsinin ərazisində seçicilərin azı 450 imzası toplanmalıdır. Sənədlər yanvarın 10-dək dairə seçki komissiyalarına təqdim edilməlidir.
Müsavat başqanı Arif Hacılı seçki yarışına 15 saylı Yasamal dairəsindən, sabiq başqan, Məclis üzvü İsa Qəmbər 19 saylı Nərimanov dairəsindən, Məclis sədri Nüşabə Sadıxlı 33 saylı Xətai dairəsindən qatılıb.
Mərkəzi Seçki Komissiyasının 7 yanvar hesabatına görə, parlament seçkisinə 2330 iddiaçı qatılıb, onların 557-si rəsmən qeydə alınıb.
Mərkəzi Seçki Komissiyası 20 partiyanın səlahiyyətli nümayəndələrini rəsmiləşdirib: Yeni Azərbaycan Partiyası, Ümid Partiyası, Vətəndaş Həmrəyliyi Partiyası, Bütöv Azərbaycan Xalq Cəbhəsi Partiyası, Böyük Quruluş Partiyası, Milli Dirçəliş Hərəkatı Partiyası, Milli İstiqlal Partiyası, Demokrat Partiyası, Böyük Azərbaycan Partiyası, Vahid Azərbaycan Partiyası, Ana Vətən Partiyası, Təkamül Partiyası, Müsavat Partiyası, Sosial Rifah Partiyası, Vəhdət Partiyası, Demokratik İslahatlar Partiyası, Liberal Demokrat Partiyası, Demokratik Maarifçilik Partiyası, Müasir Müsavat Partiyası, Vətəndaş və İnkişaf Partiyası.
