Dörd ildə manatı qorumağa 21,6 milyard dollar gedib
Dövlət Neft Fondu Mərkəzi Bankın 2019-cu ilin dekabr ayında keçirdiyi valyuta hərraclarında 886,3 milyon ABŞ dolları məbləğində vəsait satıb. Rəsmi açıqlama yanvarın 8-də yayılıb.
Novator.az bildirir ki, 2019-cu ildə Dövlət Neft Fondu manatın qorunması üçün 6 milyard 593,7 milyon dollar sərf edib. Yanvarın hərraclarında fonddan 634,9 milyon dollar, fevralın hərraclarında 316,2 milyon dollar, martın hərraclarında 600,5 milyon dollar, aprelin hərraclarında 423,7 milyon dollar, mayın hərraclarında 352,4 milyon dollar, iyunun hərraclarında 315,9 milyon dollar, iyulun hərraclarında 434,9 milyon dollar, avqustun hərraclarında 815,4 milyon dollar, sentyabrın hərraclarında 618,9 milyon dollar, oktyabrın hərraclarında 654,8 milyon dollar, noyabrın hərraclarında 539,8 milyon dollar məbləğində vəsait alınıb.
2016-cı ildə Dövlət Neft Fondunun analoji xərci 4,9 milyard dollar, 2017-ci ildə 3,6 milyard dollar, 2018-ci ildə 6,5 milyard dollar göstərilib. Dörd ilin ümumi xərci 21,6 milyard dollardır.
2015-ci ilin devalvasiyaları nəticəsində dolların rəsmi kursu 0,7844 manatdan 1,5594 manata qalxıb.
2016-cı ildə rəsmi qiymət 1,7707 manata çatıb.
2017-ci ili 1,7001 manatla yola salan dollar 2018-ci il martın 7-dən 1,7 manata təklif olunur.
