Xorvatiyanın yeni prezidenti
Xorvatiyada prezident seçkisinə yekun vurulub. Novator.az-ın məlumatına görə, yanvarın 5-də keçirilmiş ikinci turda müxalif Sosial Demokrat Partiyasının namizədi, sabiq baş nazir Zoran Milanoviç 52,7% səslə qalib gəlib. 2015-ci ilin fevral ayından prezident postunu tutan Kolinda Qrabar-Kitaroviç 47,3% səs yığıb.
Ötən il dekabrın 22-də keçirilən ilk turda 11 nəfər mübarizə aparmış, Zoran Milanoviçin 29,5%, sağ mərkəzçi Xorvat Demokratik Birliyinin namizədi Kolinda Qrabar-Kitaroviç 26,6% səs toplamışdı.
Zoran Milanoviç 1966-cı ildə paytaxt Zaqrebdə doğulub. Zaqreb Universitetinin hüquq fakültəsini bitirib, sonra Brüsseldəki Azad Universitetdə Avropa hüququ üzrə təhsil alıb.
Zaqreb Kommersiya Məhkəməsində çalışıb, 1993-cü ildən Xarici İşlər Nazirliyində qulluq edib, 1994-cü ildə ATƏT xətti ilə Azərbaycanın Dağlıq Qarabağ bölgəsindəki sülhməramlı missiyada xidmət keçib.
1999-cu ildən Sosial Demokrat Partiyasının üzvü olan Zoran Milanoviç bir müddət bu quruma sədrlik edib və parlament fraksiyasının başında dayanıb, 2011-2016-cı illərdə baş nazir kürsüsünü tutub.
