Kurtsun ikinci gəlişi
Avstriyada Sebastyan Kurtsun koalisiya hökuməti yanvarın 7-də and içərək səlahiyyətlərinin icrasına başlayıb. Novator.az-ın məlumatına görə, 1986-cı il təvəllüdlü kanslerin hökumətində onun başçılıq etdiyi Xalq Partiyası 10 nazir postu ilə təmsil olunur. Yaşıllar Partiyasına 3 nazir kürsüsü və kansler müavini vəzifəsi verilib.
2017-ci il oktyabrın 15-də keçirilmiş parlament seçkisini Xalq Partiyası udaraq Azadlıq Partiyası ilə koalisiya qurub. Kansler postunu Xalq Partiyasının lideri Sebastyan Kurts, kansler müavini postunu Azadlıq Partiyasının lideri Hayns-Kristian Ştraxe tutub.
Avstriya Azadlıq Partiyası millətçiliyi, Avropa inteqrasiyasına, köçkünlərə qarşı radikal münasibəti ilə tanınır. Ötən ilin mayında partiya liderinin 2017-ci il seçkisində Rusiyadan maliyyə yardımı istəməsinə dair video yayılıb. Bundan sonra Hayns-Kristian Ştraxe istefa verib, koalisiya dağılıb, hökumət istefaya göndərilib.
Ötən il sentyabrın 29-da keçirilmiş növbədənkənar parlament seçkisində Sebastyan Kurtsun Xalq Partiyası qalib gəlib. Hazırda bu qurumun 183 yerlik aşağı palatada 71 mandatı var.
Yaşıllar Partiyası parlamentdə 26 nəfərlə təmsil olunur.
