Ön xətdə bayram
Müdafiə Nazirliyinin rəhbər heyəti dekabrın 31-də cəbhə bölgəsindəki hərbi hissələrə baş çəkib. Mod.gov.az-ın məlumatına görə, 2016-cı ilin aprel döyüşləri zamanı Talış kəndi istiqamətində azad edilmiş ön xətt mövqelərində şəxsi heyətlə görüşən müdafiə naziri general-polkovnik Zakir Həsənov müdafiənin dayanıqlığı, hərbi qulluqçuların döyüş və mənəvi-psixoloji hazırlığını yoxlayıb, komanda-müşahidə məntəqəsindən düşmən mövqelərini izləyib.
Dünya Azərbaycanlılarının Həmrəyliyi Günü və yeni il münasibətilə şəxsi heyətə təbriklərini çatdıran müdafiə naziri xidmətdə fərqlənən hərbi qulluqçulara qiymətli hədiyyələr və bayram sovqatları təqdim edib.
Çay süfrəsi arxasında əsgərlərlə söhbət etdikdən sonra nazir şəxsi heyətin sosial-məişət şəraitinin daha da yaxşılaşdırılması ilə bağlı görülən işlərlə maraqlanıb və müvafiq tapşırıqlar verib.
Nazir səyyar tibb hospitalında müalicə olunan əsgərlərlə və hərbi tibb müəssisəsinin personalı ilə də görüşüb.
Həmin gün Zakir Həsənov və nazirliyin digər rəhbər heyəti cəbhə zonasında yeni xidməti mənzillərin təqdimetmə mərasiminə də qatılıb.
