REAL-çı fəala məhkumluq əngəli
Dekabrın 29-da Mərkəzi Seçki Komissiyası 2020-ci il fevralın 9-da keçiriləcək parlament seçkisində 20 saylı Nərimanov dairəsindən namizədliyini irəli sürmüş Respublikaçı Alternativ Partiyasının (REAL Partiya) üzvü Zaur Qurbanlı ilə bağlı məsələyə baxıb. APA-nın məlumatına görə, məhkumluq müddətinin keçmədiyini əsas gətirən Mərkəzi Seçki Komissiyası dairənin Zaur Qurbanlı ilə bağlı qərarını ləğv edib. 20 saylı Nərimanov Dairə Seçki Komissiyası dekabrın 18-də Zaur Qurbanlının namizədliyinin irəli sürülməsini təsdiqləmişdi.
Məhkumluğu olan şəxsin seçkiyə qatılması yasaqdır.
Novator.az bildirir ki, Zaur Qurbanlı 2013-cü ilin yazında üzvü olduğu “Nida” Vətəndaş Hərəkatının digər 7 təmsilçisi ilə bərabər tutulub. Bakı Ağır Cinayətlər Məhkəməsinin 6 may 2014-cü il hökmünə görə, gənclər 2013-cü il martın 10-da Bakıda kütləvi aksiya zamanı “Molotov kokteyli”ndən istifadəyə hazırlaşırmışlar. Zaur Qurbanlı 8 il həbs cəzası alıb, amma 2014-cü il dekabrın 30-da əfv sərəncamı ilə azadlığa buraxılıb.
Cinayət Məcəlləsinə əsasən, ağır cinayət törətməyə görə azadlıqdan məhrum edilmiş şəxsin məhkumluğu cəza bitən gündən 6 il keçdikdə götürülür. Bu hesabla Zaur Qurbanlının məhkumluğu 2020-ci il dekabrın 30-da bitir.
Zaur Qurbanlı 1987-ci ildə Şəki şəhərində anadan olub. Bakı Dövlət Universitetinin hüquq fakültəsini bitirib.
REAL Partiya 2018-ci ildə Respublikaçı Alternativ Hərəkatının bazasında yaradılıb. Partiyanın lideri İlqar Məmmədovdur.
