Nazirlikdən yeni evlər
Əmək və Əhalinin Sosial Müdafiəsi Nazirliyi dekabrın 29-u Bakıda, eləcə də müxtəlif rayonlarda daha 120-dək fərdi yaşayış evinin və yeni yaşayış binalarından alınmış mənzilin şəhid ailələrinə, ölkənin ərazi bütövlüyünün, müstəqilliyinin, konstitusiya quruluşunun müdafiəsi ilə əlaqədar əlilliyi olan şəxslərə təqdim edilməsinə başlayıb. Hesabata görə, bununla 2019-cu ildə şəhid ailələrinə və müharibə əlillərinə verilən fərdi ev və mənzillərin sayı 934-ə çatır. Ümumilikdə isə şəhid ailələri və müharibə əlilləri indiyədək nazirlikdən 7600-ə yaxın mənzil və fərdi ev alıb.
Prezident İlham Əliyevin 24 dekabr 2019-cu il sərəncamı ilə Qarabağ müharibəsi əlilləri və şəhid ailələri üçün fərdi evlərin tikintisi üçün 2019-cu ilin dövlət büdcəsindən Əmək və Əhalinin Sosial Müdafiəsi Nazirliyinə 20 milyon 610 min manat ayrılıb.
