Fondun 20 ili
Dekabrın 29-da Dövlət Neft Fondunun (DNF) 20 yaşı tamam olub. 29 dekabr 1999-cu ildə yaradılan fondun rəsmi hesabatına görə, fəaliyyətə başlayanda 271 milyon ABŞ dolları həcmində aktivləri olan qurumun vəsaitləri bu il 40 milyard dolları keçib: “Dövlət Neft Fonduna yarandığı vaxtdan 30 noyabr 2019-cu ilə qədər ümumilikdə təqribən 158,4 milyard ABŞ dolları həcmində vəsait daxil olub.
Vəsaitlərin bir hissəsi dövlət büdcəsinə transfert edilir.
Fonddan ayrılan ilk vəsait çadır şəhərciklərində məskunlaşmış qaçqın və məcburi köçkünlərin sosial-məişət problemlərinin həllinə yönəldilib.
Bakı-Tbilisi-Ceyhan neft kəmərinin, Oğuz-Qəbələ-Bakı su kəmərinin çəkilməsini, Samur-Abşeron suvarma sisteminin yenidən qurulmasını, “Star” neft emalı kompleksinin, Bakı-Tbilisi-Qars dəmir yolu xəttinin tikintisi layihələrini, “Cənub Qaz Dəhlizi” QSC-nin nizamnamə kapitalında dövlətin iştirak payının maliyyələşdirilməsini də DNF həyata keçirib.
Maliyyələşdirilən mühüm layihələrdən biri də 2007-2015-ci illərdə Azərbaycan gənclərinin xaricdə təhsili üzrə dövlət proqramıdır. Bu proqram çərçivəsində 3500-ə qədər gənc dünyanın 32 ölkəsinin ali məktəblərində təhsil almaq imkanı əldə edib.
Ümumilikdə bütün bu layihələrin icrasına 9,4 milyard ABŞ dolları həcmində vəsait sərf edilib.
Fondun investisiya portfelinə daxil olan aktivlər dünyanın 50-dən çox ölkəsində ABŞ dolları, avro, İngiltərə funt sterlinqi və digər valyutalarda ifadə olunan istiqrazlar, səhmlər, daşınmaz əmlak və qızıl kimi maliyyə aktivlərində saxlanır.
DNF təkcə birjada kotirovka olunan səhm yatırımları hesabına dünyanın 1600-dən çox ən iri şirkətlərində səhmdardır.
Daşınmaz əmlaka investisiya çərçivəsində isə London, Moskva, Paris, Tokio, Seul kimi şəhərlərdə birbaşa daşınmaz əmlak investisiyaları həyata keçirilib”.
