“Şahdağ” reydi
Prezident İlham Əliyev dekabrın 27-də “Şahdağ” Turizm Mərkəzinə baş çəkərək xizək sürüb.
Qusarın mərkəzindən 32 kilometr aralıda yerləşən “Şahdağ”ın təməli 2009-cu ilin sentyabrında qoyulub.
Dövlət başçısı ən hündür nöqtədə tikilən kafenin qarşısında yaradılan şəraitlə tanış olub. Ərazidə baxış meydançası yaradılıb, ehtiyat helikopter meydançası inşa edilib, hündürlüyü 30 metr olan bayraq dirəyi quraşdırılıb.
İlham Əliyev yerli və xarici turistlərlə söhbət edib.
Arayışa əsasən, “Welcome Shahdag” ərazisinin giriş hissəsi abadlaşdırılıb, ərazidə yaşıllıq zolağı salınıb, 363 yerlik yeni avtomobil dayanacağı inşa edilib, qonaqların qarşılanması, məlumatlandırılması və istiqamətləndirilməsi üçün bina tikilib. Turist avtomobilləri üçün uzunluğu 1 kilometrə yaxın olan yeni zirvə yolu da var.
Baş nazirin birinci müavini Yaqub Eyyubov və “Şahdağ” Turizm Mərkəzi QSC-nin sədri Rodderix Leffler bildiriblər ki, 2018-ci ilin martından bu ilin dekabrına qədər “Şahdağ”da ümumi uzunluğu 7,9 kilometr olan 7 eniş zolağı inşa edilib, qar yaradan 81 avadanlıq quraşdırılıb. Hazırda kompleksdəki eniş zolaqlarının ümumi uzunluğu 22,8 kilometrə çatır. Yeni quraşdırılan kanat yolları 1,4 kilometr uzunluğundadır.
Qeyd olunub ki, təbii göl və onun ətrafında tikinti-quraşdırma işləri tamamlanıb. Ərazinin abadlaşdırılması davam edir və 2020-ci ilin yaz aylarında göl ətrafında yeni park zonası istifadəyə veriləcək.
“Şahdağ” Turizm Mərkəzinin “Main Plaza” adlanan ərazisində 2 zalı olan yeni kinoteatr, oyun zalı, “Music Hall” inşa edildiyi də bildirilir.
