Neftsiz ixracın üç lideri
İqtisadi İslahatların Təhlili və Kommunikasiya Mərkəzi ixrac icmalı yayıb. Hesabata görə, 2019-cu ilin yanvar-noyabr aylarında Azərbaycanın ixracı ötən ilin müvafiq dövrünə nisbətən 2 faiz artaraq 18,3 milyard ABŞ dolları həcmində olub: “11 ayda qeyri-neft sektoru üzrə 1 milyard 781 milyon ABŞ dolları dəyərində ixrac reallaşdırılıb, 16 faiz artım qeydə alınıb.
Yanvar-noyabr ayları ərzində Rusiyaya 622,3 milyon, Türkiyəyə 363,3 milyon, İsveçrəyə 164 milyon, Gürcüstana 150,6 milyon, Ukraynaya 46,3 milyon ABŞ dolları dəyərində qeyri-neft sektoruna aid mal ixrac olunub.
11 ayda Rusiyaya qeyri-neft ixracı 12 faiz, Türkiyəyə 13 faiz, Ukraynaya 27 faiz, Gürcüstana 29 faiz, İsveçrəyə 33 faiz artıb.
İxrac edilən qeyri-neft sektoruna aid malların siyahısında pomidor birinci (166,7 milyon ABŞ dolları), sikkə kəsilməsində istifadə olunmayan, digər emal olunmamış formalarda qızıl ikinci (157,7 milyon ABŞ dolları), qabığı təmizlənmiş meşə fındığı üçüncü (113,5 milyon ABŞ dolları) olub. Meyvə-tərəvəz ixracı 541,9 milyon dollarla önə çıxıb”.
