Seçki yarışında 20 partiya var
Mərkəzi Seçki Komissiyasının 26 dekabr iclasında 2020-ci il fevralın 9-na təyin edilmiş parlament seçkisinə qatılan Vətəndaş və İnkişaf Partiyasının səlahiyyətli nümayəndələri qeydə alınıb. Novator.az bildirir ki, bununla qeydiyyatdan keçən partiyaların sayı 20-yə çatıb. Yeni Azərbaycan Partiyası, Ümid Partiyası, Vətəndaş Həmrəyliyi Partiyası, Bütöv Azərbaycan Xalq Cəbhəsi Partiyası, Böyük Quruluş Partiyası, Milli Dirçəliş Hərəkatı Partiyası, Milli İstiqlal Partiyası, Demokrat Partiyası, Böyük Azərbaycan Partiyası, Vahid Azərbaycan Partiyası, Ana Vətən Partiyası, Təkamül Partiyası, Müsavat Partiyası, Sosial Rifah Partiyası, Vəhdət Partiyası, Demokratik İslahatlar Partiyası, Liberal Demokrat Partiyası, Demokratik Maarifçilik Partiyası və Müasir Müsavat Partiyasının səlahiyyətli nümayəndələri daha əvvəl rəsmiləşib.
Növbəti parlament seçkisi 2020-ci il noyabrın 1-də keçirilməli idi. Ancaq prezident İlham Əliyev dekabrın 5-də Milli Məclisi buraxıb və növbədənkənar seçki təyin olunub.
Milli Məclisin birmandatlı dairələrdən seçilən 125 deputatı var.
Namizədin müdafiəsi üçün onun irəli sürüldüyü seçki dairəsinin ərazisində seçicilərin azı 450 imzası toplanmalıdır. Sənədlər 2020-ci il yanvarın 10-dək dairə seçki komissiyalarına təqdim edilməlidir.
Təşviqat 2020-ci il yanvarın 17-də başlanır, fevralın 8-i səhər saat 8-də dayandırılır.
Seçkidə iştirak edən seçicilərin ən çox səsini toplamış namizəd birmandatlı seçki dairəsi üzrə deputat seçilmiş hesab edilir.
Dekabrın 26-na olan hesabata görə, dairə seçki komissiyalarına 1329 iddiaçı üz tutub, 1 nəfər rəsmi namizəd kimi qeydə alınıb.
