30 sutka, iki versiya
“Paster” ləqəbli repçi Pərviz Quluzadə tutulub. Daxili İşlər Nazirliyinin mətbuat xidmətinin rəisi Ehsan Zahidov APA-ya bildirib ki, dekabrın 26-da Pərviz Quluzadə paytaxtın Binəqədi rayonunda narkotikin təsiri altında ictimai asayişi və ictimai qaydanın pozulmasına yönələn hərəkətlər edib və onu intizama çağıran polis əməkdaşlarının qanuni tələblərinə tabe olmayıb, buna görə tutulub.
Binəqədi Rayon Məhkəməsi Pərviz Quluzadəni İnzibati Xətalar Məcəlləsinin 510-cu (xırda xuliqanlıq) və 535.1-ci (polis işçisinin qanuni tələbinə qəsdən tabe olmama) maddələri ilə təqsirli bilərək ona 30 sutka inzibati həbs cəzası kəsib.
Pərviz Quluzadənin yaxınları isə həbsi repçinin son günlərdə söylədiyi replərlə əlaqləndirir. “Azadlıq” radiosunun məlumatına görə, yaxınları iddia edirlər ki, həbsin səbəbi həmin repdə səslənən siyasi fikirlərdir.
Qeyd olunur ki, Pərviz Quluzadə dekabrın 26-da deyil, daha əvvəl tutulub və bir müddət Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsində saxlanıb.
