Vergi Məcəlləsi yeniləndi
Vergi Məcəlləsinə dəyişikliklər prezident İlham Əliyevin imzası ilə təsdiqlənib.
Novator.az bildirir ki, 2020-ci il yanvarın 1-dən qüvvəyə minəcək yeniliklərdən birinə görə, sahibkarlıq və investisiya fəaliyyətini təşviq edən vergi azadolmaları və güzəştləri fərdi xarakter daşımamalıdır.
Başqa bir dəyişikliyə əsasən, bina tikintisi fəaliyyəti ilə məşğul olan şəxslər binalardan dövlətə yaşayış və qeyri-yaşayış sahələri ayırdıqda dövlətə ayrılan yaşayış və qeyri-yaşayış sahələrinin təqdim edilməsi üzrə dövriyyələr vergiyə cəlb olunan gəlir hesab edilmir.
Məcəlləyə riskli vergi ödəyicisi (Nazirlər Kabinetinin təsdiq etdiyi meyarlara cavab verən, o cümlədən əmtəəsiz və (və ya) riskli əməliyyatlar aparan şəxs) anlayışı daxil edilir.
Digər yeniliyə görə, bu vergi ödəyiciləri mərkəzləşdirilmiş qaydada uçota alına bilərlər: təbii inhisar subyektləri; xüsusi vergi rejimli müəssisələr; işçilərin orta siyahı sayı 251 və ondan yuxarı olan, balansında olan əsas vəsaitlərin orta illik qalıq dəyəri 5 milyon manatdan yuxarı vergi ödəyiciləri.
