Büdcədən vəsait almaq qaydası
Prezident İlham Əliyev dövlət adından yaradılan publik hüquqi şəxslərə büdcədən məqsədli vəsaitlərin ödənməsi qaydasını təsdiqləyib.
Publik hüquqi şəxs dövlət və bələdiyyə adından yaradılan, ümumdövlət və (və ya) ictimai əhəmiyyət daşıyan fəaliyyətlə məşğul olan, dövlət və ya bələdiyyə orqanı olmayan təşkilatdır.
Novator.az bildirir ki, qaydaya görə, vəsaitlərin ödənməsi üçün dövlət orqanının (qurumun) tabeliyində yaradılan publik hüquqi şəxslə onun tabe olduğu orqan (qurum) arasında, belə orqan (qurum) olmadıqda isə bilavasitə publik hüquqi şəxslə Maliyyə Nazirliyi arasında vəsaitlərin publik hüquqi şəxslər üzrə bölgüsü aparıldığı tarixdən 15 iş günü müddətində müqavilə bağlanır.
Müqavilədə bu məsələlər əks etdirilir: müqavilənin predmeti; tərəflərin hüquq və öhdəlikləri, o cümlədən publik hüquqi şəxsin həyata keçirəcəyi təyinatlı tədbirlərin dairəsi; publik hüquqi şəxsin dövlət büdcəsindən ayrılan vəsaitdən istifadəsi barədə hesabatlılığın forması; tərəflərin məsuliyyəti və onların qarşılıqlı razılığı əsasında digər şərtlər.
Vəsaitlərin ödənməsi müvafiq büdcə ilini – yanvarın 1-dən dekabrın 31-dək olan müddəti əhatə edir, rüblər və aylar üzrə bölgü nəzərə alınmaqla aparılır.
Publik hüquqi şəxslərin dövlət büdcəsi hesabına müqavilə əsasında həyata keçirdikləri tədbirlər üzrə xərclər bu məqsədlər üçün dövlət büdcəsində nəzərdə tutulmuş vəsaitdən çox olmamalıdır.
Alınan vəsaitlərdən istifadə barədə aylıq, rüblük və ilin əvvəlindən artan yekunla funksional, iqtisadi və inzibati təsnifat üzrə hesabatlar verilməlidir.
Dekabrın 24-də imzaladığı fərmanda dövlət başçısı Nazirlər Kabinetinə vəsaitlərin ödənməsi üzrə müqavilənin nümunəvi formasını 15 gün müddətində müəyyən etməyi tapşırıb.
