Qəzetlərə maliyyə: 19 istiqamət, 3 kateqoriya
Dekabrın 25-də Kütləvi İnformasiya Vasitələrinin İnkişafına Dövlət Dəstəyi Fondunun Müşahidə Şurasının iclası keçirilib. Rəsmi məlumata görə, iclasda bəyan olunub ki, qəzetlərə maliyyə yardımı müsabiqəsinin dekabrın 26-dan 2020-ci il yanvarın 10-dək 19 istiqamət üzrə keçirilməsi nəzərdə tutulur. 2020-ci ilin birinci yarısında da ictimai-siyasi qəzetlərin 3 kateqoriyaya (gündəlik, günaşırı və həftəlik) bölünməsi və maliyyələşdirilməsi təklif edilir.
Gündəlik (həftədə 5 dəfədən az olmayaraq çap olunan) qəzetlərə aylıq 20 min manat; günaşırı (həftədə 3 dəfədən az olmayaraq çap olunan) qəzetlər ayda 10 min manat; həftəlik qəzetlər ayda 5 min manat maliyyə vəsaiti alacaq.
Kütləvi İnformasiya Vasitələrinin İnkişafına Dövlət Dəstəyi Fondunun Müşahidə Şurasının sədri postunu “Xalq qəzeti”nin baş redaktoru Həsən Həsənov tutur. 2009-cu ildə yaradılmış fonda Vüqar Səfərli icraçı direktorluq edir.
