Pensiyalarda mümkün artım
Novator.az yenidən pensiyalarda mümkün artım göstəricilərinə nəzər yetirib.
“Əmək pensiyaları haqqında” qanuna görə, 2020-ci ildən əmək pensiyasının sığorta hissəsi orta aylıq nominal əməkhaqqının illik artım tempinə uyğun indeksləşdiriləcək.
Sığortaolunanların fərdi hesabının sığorta hissəsində qeydə alınan pensiya kapitalını isə istehlak qiymətləri indeksinin illik səviyyəsinə uyğun indeksləşdirmək qərara alınıb.
Əmək pensiyasının sığorta hissəsi fərdi hesabın sığorta hissəsində qeydə alınmış pensiya kapitalının gözlənən pensiya ödənişi müddətinin aylarının sayına (144 ay) nisbəti şəklində hesablanan məbləğdir.
Pensiya kapitalı fərdi hesabın sığorta hissəsində qeydə alınan və fərdi hesabın yığım hissəsində toplanan vəsaitlərin məbləğidir.
İndeksləşdirmə Dövlət Statistika Komitəsindən Əmək və Əhalinin Sosial Müdafiəsi Nazirliyinə təqdim olunan rəsmi bilgi əsas götürülməklə həyata keçirilir.
Dövlət Statistika Komitəsinin hesabatına əsasən, 2019-cu il noyabrın 1-nə Azərbaycan iqtisadiyyatında muzdla çalışan işçilərin orta aylıq nominal əməkhaqqı əvvəlki ilin müvafiq dövrünə nisbətən 13,7 faiz artaraq 614,2 manata çatıb.
2019-cu ilin yanvar-oktyabr aylarında istehlak məhsulları və xidmətlərin isə 2018-ci ilin eyni dövrünə nisbətən 2,6 faiz bahalaşdığı açıqlanıb.
Hazırda Azərbaycanda əmək pensiyasının minimum məbləği 200 manatdır. Ölkə üzrə orta aylıq nominal əməkhaqqının 13,7 faiz artmasından çıxış etsək, 2020-ci ilin indeksləşdirməsi nəticəsində minimum pensiya məbləği 27,4 manat artacaq.
Rəsmi hesabata görə, 2019-cu il oktyabrın 1-nə Dövlət Sosial Müdafiə Fondunda 1 milyon 282 min nəfər pensiyaçı qeydiyyatda olub. Aylıq pensiyaların orta məbləği 240,6 manat göstərilib.
