Nazirliyi böyüdən fərman: kabinetə verilən vaxt bitib
Oktyabrın 23-də fərman imzalayan prezident İlham Əliyev Vergilər Nazirliyi, Əmlak Məsələləri Dövlət Komitəsi və Antiinhisar və İstehlak Bazarına Nəzarət Dövlət Agentliyini İqtisadiyyat Nazirliyinin strukturuna daxil etdi. Nazirliyin strukturu belə müəyyən olundu: Aparat (şöbələr və sektorlar); Dövlət Vergi Xidməti; Əmlak Məsələləri Dövlət Xidməti; Antiinhisar və İstehlak Bazarına Nəzarət Dövlət Xidməti; regional bölmələr; Azərbaycanın xarici ölkələrdə fəaliyyət göstərən səfirlik və konsulluqlarında ticarət nümayəndələrinin aparatları.
Fərmana əsasən, İqtisadiyyat Nazirliyinin strukturuna daxil olan dövlət orqanlarının və onların tabeliyindəki qurumların strukturu, işçilərinin say həddi, hüquqi vəziyyəti, vəzifə maaşları, əməyin ödənilməsi sistemi və xidmətlə bağlı hüquq və vəzifələri ilkin mərhələdə dəyişməz qalıb.
Novator.az bildirir ki, 23 oktyabr fərmanında Nazirlər Kabinetinə İqtisadiyyat Nazirliyinin yeni əsasnaməsini iki ay müddətində hazırlamaq tapşırılıb. Həmin müddət dekabrın 23-də tamamlanıb. Əsasnamə hələ yenilənmədiyi üçün Vergilər Nazirliyi, Əmlak Məsələləri Dövlət Komitəsi və Antiinhisar və İstehlak Bazarına Nəzarət Dövlət Agentliyi fəaliyyətlərini davam etdirirlər.
İqtisadiyyat naziri vəzifəsini Mikayıl Cabbarov tutur. O, oktyabrın 23-dək vergilər naziri olub.
Əmlak Məsələləri Dövlət Komitəsinə başçılıq etmiş Kərəm Həsənov hazırda prezidentin köməkçisi-administrasiyanın dövlət nəzarəti məsələləri şöbəsinin müdiridir.
