Açılış və təqdimat
Dekabrın 24-ü Bakının Xəzər rayonunda Dayanıqlı və Operativ Sosial Təminat Agentliyinin 2 saylı DOST Mərkəzi açılıb. Prezident İlham Əliyev açılışda iştirak edib, mərkəzin kollektivi ilə görüşüb.
Həmin gün dövlət başçısı Nizami rayonunda şəhid ailələri və Qarabağ müharibəsi əlilləri üçün inşa olunmuş yaşayış binasında mənzillərin, Qarabağ müharibəsi əlillərinə və onlara bərabər tutulan şəxslərə avtomobillərin təqdim olunması mərasiminə də qatılıb.
Xəbəri AZƏRTAC yayıb.
İlham Əliyev dekabrın 24-də ad gününü qeyd edir. 1961-ci ildə Bakı şəhərində doğulan İlham Əliyev Moskva Dövlət Beynəlxalq Münasibətlər İnstitutunu və həmin təhsil müəssisəsinin aspiranturasını bitirib, tarix elmləri namizədidir. 1990-cı ilədək Moskva Dövlət Beynəlxalq Münasibətlər İnstitutunun müəllimi olub, sonra özəl biznes sahəsində çalışıb.
1994-cü ildən İlham Əliyev Azərbaycan Dövlət Neft Şirkətinin vitse-prezidenti, 1997-ci ildən birinci vitse-prezidenti postunu tutub, 1995-2003-cü illərdə Milli Məclisin deputatı olub. 2003-cü ilin avqust-oktyabr aylarında baş nazir postunu tutub.
2003, 2008, 2013 və 2018-ci illərdə prezident seçilib.
