100 manatı neçə nəfər alacaq?
Əmək və Əhalinin Sosial Müdafiəsi Nazirliyi prezident İlham Əliyevin aztəminatlı ailələrə birdəfəlik yardım göstərilməsi sərəncamı barədə açıqlama yayıb. Dekabrın 23-də imzalanan həmin sərəncamda 2019-cu il dekabrın 30-na ünvanlı dövlət sosial yardımı alan ailələrin hər birinə 100 manat məbləğində birdəfəlik yardım ödənməsi tapşırılıb. Bunun üçün 2019-cu ilin dövlət büdcəsindən 7,6 milyon manat ayrılacaq.
Əmək və Əhalinin Sosial Müdafiəsi Nazirliyi bildirir ki, sərəncamın 73 minədək ailəni (290 minə yaxın ailə üzvünü) əhatə edəcəyi gözlənir: “Birdəfəlik yardım ünvanlı dövlət sosial yardımı alan ailələrin hesablarına köçürüləcək. Onlar birdəfəlik yardımı ünvanlı dövlət sosial yardımını aldıqları plastik ödəniş kartları vasitəsilə əldə edəcəklər”.
2006-cı il yanvarın 1-dən orta aylıq gəliri onlardan asılı olmayan səbəblərdən hər bir ailə üzvü üçün ehtiyac meyarının məcmusundan aşağı ailələrə ünvanlı dövlət sosial yardım verilir. Həmin ailələr 1 yaşa qədər uşağa görə əlavə 55 manat aylıq müavinət alır.
Ünvanlı dövlət sosial yardımının təyin edilməsi məqsədilə 2019-cu il üçün ehtiyac meyarının həddi 143 manat məbləğində götürülüb. 2020-ci ildə ehtiyac meyarının həddi 160 manat olacaq.
