Yarmarkalar və vakansiyalar
Dövlət Məşğulluq Xidməti 2019-cu ildə Azərbaycanın 56 şəhər və rayonunda əmək yarmarkaları təşkil edib. Hesabatı Əmək və Əhalinin Sosial Müdafiəsi Nazirliyi yayıb. Qeyd olunur ki, yarmarkalarda 1324 dövlət və özəl müəssisəsi 15183 vakant iş yeri təqdim edib, 3411 nəfər işsiz və işaxtaran vətəndaş iş yerlərinə göndəriş alıb, 298 nəfərin peşə hazırlığı kurslarına qeydiyyatı aparılıb, 311 nəfər ödənişli ictimai işlərə cəlb olunub.
Başqa bir rəsmi məlumata görə, Əmək və Əhalinin Sosial Müdafiəsi Nazirliyinin mərkəzləşdirilmiş elektron informasiya sistemindəki “Məşğulluq” altsisteminə daxil edilən vakant iş yerlərinin sayı 17500-ə çatıb.
“Məşğulluq haqqında” qanuna əsasən, işəgötürənlər yeni iş yeri və boşalan iş yeri barədə məlumatları ən geci 5 iş günü müddətində vakansiya bankına daxil etməlidirlər.
