Şotlandiya yenə üz çevirir
Şotlandiya yenidən müstəqillik referendumuna getmək istəyir. Novator.az-ın məlumatına görə, Şotlandiyanın birinci naziri, Şotland Milli Partiyasının lideri Nikola Stercen Böyük Britaniyanın baş naziri Boris Consona məktubunda referendumun 2020-ci ildə keçirilməsinə icazə verilməsi tələbi qoyub.
Nikol Stercen qeyd edib ki, Şotlandiya Böyük Britaniyanın Avropa İttifaqından ayrılması ilə razılaşmadığı üçün müstəqil dövlət olmağa məhkumdur.
2016-cı il iyunun 23-ü Böyük Britaniyada keçirilmiş referendumda seçicilərin 51,9%-i ölkənin Avropa İttifaqından ayrılmasına səs verib. Bu ayrılıq 2020-ci il yanvarın 31-də rəsmiləşməlidir. Şotlandların 62 faizi 2016-cı il referendumunda Avropa İttifaqında qalmağa tərəfdar olub.
1707-ci ildən İngiltərə ilə ittifaqda olan Şotlandiya 1997-ci ildə muxtariyyət əldə edib, öz parlamenti və hökuməti var.
Uels və Şimali İrlandiya da Böyük Britaniyaya daxildir.
2014-cü il sentyabrın 18-də Şotlandiyada ilk müstəqillik referendumu olub, seçicilərin 55,4%-i Böyük Britaniyanın tərkibində qalmağı üstün bilib.
Böyük Britaniya parlamentinin aşağı qanadı olan İcmalar Palatasına dekabrın 12-də keçirilmiş növbədənkənar seçkidə hakim Mühafizəkarlar Partiyası 650 yerlik İcmalar Palatasında 365 mandata sahib olub, ana müxalifət – Leyboristlər Partiyası 202 mandat götürüb.
Şotland Milli Partiyası parlamentə 48 mandatla keçib.
23 iyun 2016-cı il referendumundan sonra Avropa İttifaqında qalmaq tərəfdarı olan baş nazir Devid Kemeron istefaya gedib. İyulun 13-də Tereza Mey baş nazir postuna təyin edilib. 2017-ci il iyunun 8-də keçirilmiş növbədənkənar parlament seçkisindən sonra Tereza Meyin Mühafizəkarlar Partiyası yenidən hökumət qurub.
2019-cu ilin iyun ayında Tereza Mey Mühafizəkarlar Partiyasının lideri postundan istefa verib, baş nazir kürsüsündən ayrılıb. Bunun ardınca Boris Conson Mühafizəkarlar Partiyasının lideri seçilib və baş nazirliyə başlayıb.
1957-ci ildə yaradılmış Avropa İttifaqının Böyük Britaniyadan başqa 27 üzvü var: Almaniya, Avstriya, Belçika, Bolqarıstan, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan.
Böyük Britaniya Avropa İttifaqından bu ilin martında ayrılmalı idi. Əvvəl müddət oktyabrın sonunadək uzadılıb, sonra məsələnin 2020-ci il yanvarın 31-nə qaldığı açıqlanıb.
