Prezident Rusiyadadır
Prezident İlham Əliyev dekabrın 20-də Rusiyanın Sankt-Peterburq şəhərinə gedib. Səfərin məqsədi Müstəqil Dövlətlər Birliyinin (MDB) qeyri-rəsmi sammitində iştirakdır.
AZƏRTAC xəbər verir ki, Sankt-Peterburq şəhərinin Pulkovo-1 hava limanında dövlət başçısını Leninqrad vilayətinin qubernatoru və digər rəsmi şəxslər qarşılayıb.
MDB-nin əsası Rusiya, Belarus və Ukrayna dövlət başçılarının 8 dekabr 1991-ci ildə imzaladığı sazişlə qoyulub.
21 dekabr 1991-ci ildə keçmiş SSRİ-nin daha 8 respublikası – Moldova, Azərbaycan, Ermənistan, Qazaxıstan, Özbəkistan, Türkmənistan, Qırğızıstan, Tacikistan sazişi imzalayaraq MDB-yə qoşulublar.
Azərbaycanın MDB-yə qoşulması 20 sentyabr 1993-cü ildə rəsmiləşib. 1993-cü il dekabrın 9-da Gürcüstan da MDB-yə daxil olub.
Sonralar Rusiyanın hərbi təcavüzünə məruz qalan Gürcüstan və Ukrayna MDB-dən ayrılıblar.
MDB-nin icra orqanı Minskdə yerləşir.
