Sərmayə hara gedir?
2019-cu ilin yanvar-noyabr aylarında Azərbaycan iqtisadiyyatına 12 milyard 786,9 milyon manat və ya əvvəlki ilin 11 ayı ilə müqayisədə 2,8 faiz az sərmayə yönəldilib. Novator.az-ın məlumatına görə, hesabatı yayan Dövlət Statistika Komitəsi bildirir ki, qeyri neft-qaz sektoruna yatırılan vəsaitin həcmi 3,5 faiz artıb.
Rəsmi açıqlamaya əsasən, 11 aylıq sərmayənin 49,2 faizi sənaye, 22,4 faizi tikinti, 13 faizi nəqliyyat və anbar təsərrüfatı, 3,5 faizi kənd təsərrüfatı, meşə təsərrüfatı və balıqçılıq, 3,1 faizi dövlət idarəetməsi və müdafiə; sosial təminat, 2,1 faizi təhsil, 1,9 faizi informasiya və rabitə, 1 faizi ticarət; nəqliyyat vasitələrinin təmiri, 0,9 faizi əhaliyə səhiyyə xidmətləri və sosial xidmətlərin göstərilməsi, 0,8 faizi peşə, elmi və texniki fəaliyyət, 0,6 faizi inzibati və yardımçı xidmətlərin göstərilməsi, 0,5 faizi turistlərin yerləşdirilməsi və ictimai iaşə, 0,4 faizi digər sahələrdə xidmətlərin göstərilməsi, 0,3 faiz maliyyə və sığorta fəaliyyəti, 0,2 faizi istirahət, əyləncə və incəsənət sahəsində fəaliyyət, 0,1 faizi daşınmaz əmlakla əlaqədar əməliyyatlar sahələrinə sərf edilib.
Qeyd olunur ki, xarici müəssisə və təşkilatlar əsas kapitala 3 milyard 766,7 milyon manat vəsait qoyub. Bu vəsaitin 84,5 faizi Böyük Britaniya, Türkiyə, ABŞ, İsveçrə, Yaponiya, Malayziya, Rusiya, İran, Fransa, Norveç və Çexiya sərmayədarlarına məxsus olub.
Başqa bir hesabata görə, yanvar-noyabr aylarında ictimai iaşə dövriyyəsi 2018-ci ilin eyni dövrü ilə müqayisədə real ifadədə 6,1 faiz, əhaliyə göstərilən ödənişli xidmətlərin dəyəri real ifadədə 2,5 faiz artıb.
