Rasim Mövsümzadə beynəlxalq müsabiqədə gümüş medal aldı
Moskvada idman jurnalistlərinin “Energiya pobed” ənənəvi müsabiqə-festivalına yekun vurulub. Azərbaycanlı jurnalist Rasim Mövsümzadə (Mövsümov) beynəlxalq müsabiqənin əcnəbi rusdilli kütləvi informasiya vasitələri arasında “Ən yaxşı yazı” nominasiyasında 2-ci yeri tutaraq gümüş medalla təltif olunub.
Novator.az-a danışan Rasim Mövsümzadə deyib ki, “Sportsman” jurnalında çıxan “Məlum və naməlum Qullit” yazısı medala layiq görülüb: “Həmin yazıda futbolla bağlı uşaqlıq xatirələrim, ötən əsrin 80-ci illərinin sovet mətbuatı, həmçinin nüfuzlu “Qızıl top” mükafatı və məşhur niderlandlı futbolçu Ruud Qullit barədə faktlar yer alıb.
“Qazprom” şirkətinin dəstəyi, Rusiya Olimpiya Komitəsi və Rusiya İdman Jurnalistləri Federasiyasının birgə təşkilatçılığı ilə keçirilən yarışmaya Rusiya regionlarından və xarici ölkələrdən müxtəlif nominasiyalar üzrə 305 jurnalist qatılmışdı. Son bir il ərzində işıq üzü görmüş işlərin qəbul edildiyi müsabiqənin münsiflər heyətinin sədri məşhur idman şərhçisi Viktor Qusev idi.
Laureatların mükafatlandırılması mərasimi Moskvada – “Krasnı Oktyabr” art-klasterində keçirildi. Qalib və mükafatçılara medal, diplom və xatirə hədiyyələri təqdim olundu.
“Energiya pobed” müsabiqə-festivalı ilk dəfə 2011-ci ildə təşkil edilib. İndiyədək yarışmaya Rusiya və yaxın və uzaq xaricin 20 ölkəsindən iki mindən çox jurnalist qatılıb”.
Yazıları müxtəlif vaxtlarda Türkiyə, Almaniya, Fransa, İngiltərə, Rusiya və başqa ölkələrdə nəşr olunan Rasim Mövsümzadə həmçinin “Bir qolun tarixçəsi” kitabının müəllifidir. O, 2007-ci ilin fevralında Rusiyanın “Ves futbol” jurnalının dünya futbol çempionatlarının tarixinə həsr edilən çətin viktorinasının qalibi olub.
Rasim Mövsümzadə 2013-cü ildə Türkiyədə “İlin ən yaxşı əcnəbi idman yazarı” nominasiyasında “Futbol Oskarı” mükafatına, 2015-ci ildə “Sportsman” jurnalının “İlin idman jurnalisti” nominasiyasında “Zəfər” mükafatına layiq görülüb.
