Real gəlirlərin artım tempi aşağı düşüb
İqtisadçı Rövşən Ağayev Dövlət Statistika Komitəsinin son makroiqtisadi hesabatı ilə bağlı şərh yayıb. Novator.az-ın məlumatına görə, ekspert özünün “Facebook” səhifəsində qeyd edir ki, rəsmi statistikada diqqət çəkən məqamlardan biri əhalinin real gəlirləri məsələsidir: “Hesabata əsaslansaq, iki devalvasiyanın yaşandığı 2015-ci ilin ağır sosial-iqtisadi böhranından sonra əhalinin real gəlirlərinin ən aşağı artım tempi 2019-cu ildə qeydə alınır. Baxmayaraq ki, əməkhaqqının ən yüksək artım tempi də 2019-cu ilə təsadüf edir.
Real gəlirlər nominal gəlirlər və rəsmi inflyasiya göstəriciləri əsasında hesablanır. 11 ayda əhalinin gəlirlərinin nominal ifadədə 7,4%, istehlak qiymətlərinin 2,6% artdığı açıqlanıb.
Əhalinin real gəlirlərinin artımı 2016-cı ildə 8,2%, 2017-ci ildə 8,9%, 2018-ci ildə 9,2% artdığı halda 2019-cu ilin 11 ayının yekununda artım 4,8%-dir”.
Statistikaya görə, yanvar-oktyabr aylarında muzdla işləyənlərin orta aylıq nominal əməkhaqqı 2018-ci ilin müvafiq dövrünə nisbətən 13,7% artıb.
Rövşən Ağayev bununla bağlı yazır: “Əməkhaqqının artım tempinin əhalinin ümumi gəlirlərinin artım tempi ilə sinxronluq təşkil etməməsinin əsas səbəbi odur ki, Azərbaycanda əhalinin gəlirlərinin ən yaxşı halda 25-30%-i maaşlardan formalaşır. Məşğul əhalinin ən yaxşı halda hər 100 nəfərindən 30-32 nəfəri rəsmi əməkhaqqı alır”.
